Englishहिन्दीಕನ್ನಡമലയാളംతెలుగు

நியூசிலாந்திற்கு எதிரான 2வது டுவென்டி20: கடைசி வரை போராடிய இந்தியா 1 ரன்னில் தோல்வி

Posted by:
Updated: Wednesday, September 12, 2012, 19:19 [IST]
 

சென்னை: நியூசிலாந்திற்கு எதிரான 2வது டுவென்டி20 போட்டியில் கடைசி வரை போராடிய இந்திய அணி 1 ரன் வித்தியாசத்தில் தோல்வி அடைந்தது. புற்றுநோயில் இருந்து குணமாகி நேற்று மீண்டும் சர்வதேச போட்டியில் களமிறங்கிய யுவராஜ் சிங் வழக்கம் போல தனது அதிரடியை காட்டினார்.

இந்தியாவிற்கு சுற்றுப்பயணம் வந்துள்ள நியூசிலாந்து அணி 2 போட்டிகள் கொண்ட டுவென்டி20 தொடரில் பங்கேற்றது. இதில் விசாகப்பட்டனத்தில் நடைபெற இருந்த முதல் போட்டி மழையால் ரத்தானது. இந்த நிலையில் நேற்று இரு அணிகளுக்கும் இடையிலான 2வது டுவென்டி20 போட்டி சென்னை சேப்பாக்கம் மைதானத்தில் நடைபெற்றது.

நியூசிலாந்திற்கு எதிரான 2வது டுவென்டி20: கடைசி வரை போராடிய இந்தியா 1 ரன்னில் தோல்வி

நுரையீரல் புற்றுநோய் காரணமாக கடந்த 10 மாதங்களுக்கு மேலாக சர்வதேச கிரிக்கெட் போட்டிகளில் பங்கேற்காமல் இருந்த யுவராஜ் சிங் நேற்று களமிறங்கினார். நியூசிலாந்து அணியின் துவக்க வீரர் நிகோல் 4 பந்துகளை சந்தித்து டக் அவுட்டாகி அதிர்ச்சி அளித்தார்.

மற்றொரு துவக்க வீரர் மார்டின் குப்தில் 1 ரன் மட்டுமே எடுத்து வெளியேறினார். ஆனால் அதன்பிறகு வந்த மெக்கல்லம், வில்லியம்சன் உடன் ஜோடி சேர்ந்து அதிரடியாக ரன்களை குவித்தார். 3 பவுண்டரிகளுடன் 28 ரன்களை குவித்த வில்லியம்சன், அஸ்வினிடம் கேட்சாகி அவுட்டானார்.

55 பந்துகளில் 3 சிக்ஸ், 11 பவுண்டரிகளை விளாசிய மெக்கல்லம் 91 ரன்கள் எடுத்த நிலையில் போல்டானார். அடுத்து வந்த பிராங்க்ளின் 1 ரன் மட்டுமே எடுத்து ஏமாற்றினார்.

கடைசி கட்டத்தில் கேப்டன் ரோஸ் டெய்லர்(25), ஜேக்கப் ஓரம்(18) ஆகியோர் பொறுப்பாக ஆடி அணியின் ஸ்கோரை உயர்த்தினர். நிர்ணயிக்கப்பட்ட 20 ஓவர்களின் முடிவில் நியூசிலாந்து அணி 5 விக்கெட்களை இழந்து 167 ரன்களை எடுத்தது. இந்திய அணியின் தரப்பில் இர்பான் பதான் சிறப்பாக பந்துவீசி 3 விக்கெட்களை எடுத்தார்.

168 ரன்களை எடுத்தால் வெற்றி பெறலாம் என்ற இலக்குடன் களமிறங்கிய இந்திய அணிக்கு, துவக்க வீரர் கம்பிர் 3 ரன்களில் அவுட்டாகி ஏமாற்றம் அளித்தார். அதன்பி்றகு விராத் கோஹ்லி, சுரேஷ் ரெய்னா உடன் ஜோடி சேர்ந்து அதிரடியாக ஆடினார். 22 பந்துகளில் 1 சிக்ஸ், 2 பவுண்டரிகளை விளாசிய ரெய்னா 27 ரன்கள் எடுத்து அவுட்டானார்.

ஆனால் தொடர்ந்து அதிரடியாக ஆடிய விராத் கோஹ்லி டுவென்டி20 போட்டிகளில் தனது 2 அரைசதத்தை பூர்த்தி செய்தார். அடுத்து வந்த யுவராஜ் சிங், கோஹ்லிக்கு சிறப்பான ஒத்துழைப்பு அளித்து ஆடினார். 10 மாதங்களுக்கு பிறகு மீண்டும் சர்வதேச போட்டியில் களமிறங்கிய யுவராஜ் சிங்கிற்கு, ரசிகர்கள் உற்சாக வரவேற்பு அளித்தனர்.

இந்த நிலையில் 41 பந்துகளில் 1 சிக்ஸ், 10 பவுண்டரிகளை விளாசிய விராத் கோஹ்லி 70 ரன்கள் எடுத்து அவுட்டானார். அணியின் இக்கட்டான சூழ்நிலையில் களமிறங்கிய கேப்டன் டோணி பொறுமையாக ஆடினார். இதனால் போட்டியில் இந்தியா வெற்றி பெறுமா என்ற சந்தேகம் எழுந்தது.

கடைசி ஓவரில் 13 ரன்கள் தேவைப்பட்ட நிலையில், 4வது பந்தை அடித்து ஆட முயன்ற யுவராஜ் சிங் போல்டானார். 26 பந்துகளில் 2 சிக்ஸ், 1 பவுண்டரி அடித்த யுவராஜ் சிங் 34 ரன்கள் எடுத்து அவுட்டானார். 5வது பந்தில் ரோகித் சர்மா 2 ரன்கள் எடுக்க கடைசி பந்தில் 4 ரன்கள் தேவைப்பட்டன.

கடைசி பந்தில் 2 ரன்கள் மட்டும் எடுக்கப்பட, இந்திய அணி நிர்ணயிக்கப்பட்ட 20 ஓவர்களின் முடிவில் 4 விக்கெட்கள் இழப்பிற்கு 166 ரன்கள் எடுத்தது. இதன்மூலம் நியூசிலாந்து அணி 1 ரன் வித்தியாசத்தில் வெற்றி பெற்றது. மேலும் இந்தியாவிற்கு எதிரான டுவென்டி20 தொடரில் நியூசிலாந்து அணி 1-0 என்ற கணக்கில் கைப்பற்றியது.

Story first published:  Wednesday, September 12, 2012, 10:06 [IST]
English summary
It was a tense finish at the MA Chidambaram Stadium on Tuesday night. And New Zealand denied Yuvraj Singh a winning comeback as they clinched a nail-biting one-run win over India in the Twenty20 International. Chasing 168, India were so near yet so far finishing at 166/4 in 20 overs.
கருத்தை எழுதுங்கள்