Englishहिन्दीಕನ್ನಡമലയാളംతెలుగు

இது ஆட்டம்... பாகிஸ்தானை பந்தாடி இந்தியா அபார வெற்றி!

Posted by:
Updated: Monday, October 1, 2012, 8:13 [IST]
 

இது ஆட்டம்... பாகிஸ்தானை பந்தாடி இந்தியா அபார வெற்றி!
 

கொழும்பு: நம்ம இந்தியாவா இது என்று ரசிகர்களே வியந்து போகும் அளவுக்கு நேற்று நடந்த டுவென்டி 20 உலகக் கோப்பைப் போட்டி சூப்பர் எட்டு சுற்று ஆட்டத்தில் பாகிஸ்தானை பந்தாடி விட்டது இந்தியா. பேட்டிங், பவுலிங், பீல்டிங் என அனைத்திலும் நம்மவர்கள் பின்னிப் பெடலெடுத்து விட்டார்கள்.

பாலாஜி, அஸ்வின், யுவராஜ் சிங் ஆகியோரின் சிறப்பான பந்து வீச்சு, விராத் கோஹ்லியின் புயல் வேக ஆட்டம் ஆகியவற்றின் காரணமாக இந்தியா பாகிஸ்தானை எட்டு விக்கெட் வித்தியாசத்தில் வீழ்த்தி அரை இறுதிக்கான வாய்ப்பு பறி போகாமல் தப்பி விட்டது.

கொழும்பில் நேற்று நடந்த முக்கியமான ஆட்டத்தில் பாகிஸ்தானை சந்தித்தது இந்தியா. இந்தப் போட்டியில் இந்தியா வெல்லாவிட்டால அரை இறுதி வாய்ப்பு கிட்டத்தட்ட பறி போயிருக்கும். ஆனால் அதை உணர்ந்து இந்திய வீரர்கள் மிக மிக பொறுப்புடன் ஆடி ஆல் ரவுண்ட் பெர்மான்ஸைக் காட்டி பிரமாதப்படுத்தி விட்டனர்.

ஆட்டம் தொடங்கியது முதல் முடியும் வரை இந்திய வீரர்கள் படா சுறுசுறுப்புடன், பொறுப்புடன், விறுவிறுப்புடன் ஆடியதால் மைதானத்தில் கூடியிருந்த இந்திய ரசிகர்கள் பெரும் உற்சாகத்தில் மூழ்கியிருந்தனர்.

முதலில் பாகிஸ்தான் பேட்டிங் செய்தது. இந்திய அணியில் இரண்டு மாற்றங்களாக அதிரடி வீரர் ஷேவாக் மற்றும் பந்து வீச்சாளர் பாலாஜி ஆகியோர் சேர்க்கப்பட்டிருந்தனர்.

பந்து வீச்சில் நேற்று தனது அனுபவத் திறமையை வெளிப்படுத்தினார் பாலாஜி. அவர் மற்றும், அஸ்வின், யுவராஜ் சிங் ஆகியோரின் சிறப்பான பந்து வீச்சு காரணமாக தொடக்கம் முதலே சுதாரிக்க முடியாமல் வீழ்ந்து போனது பாகிஸ்தான். பாகிஸ்தான் எப்போதெல்லாம் ரன் குவிக்க முற்பட்டதோ அப்போதெல்லாம் விக்கெட்டைத் தூக்கி பட்டையைக் கிளப்பி விட்டனர் இந்திய வீரர்கள்.

இந்தியாவின் பீல்டிங்கும் நேற்று சிறப்பாகவே இருந்தது. இது நாள் வரை சொதப்பலாக பீல்டிங் செய்து வந்த இந்திய வீரர்கள் நேற்று மிக மிக சுறுசுறுப்புடன் காணப்பட்டனர். பந்து கால் வரை வந்து சேரட்டும் என்று காத்திருக்காமல் ஓடி ஓடிப் போய் பீல்டிங் செய்து பாகிஸ்தானை அலற வைத்தனர்.

இந்தியாவின் இந்த நெருக்கடியான பீல்டிங் மற்றும் பவுலிங் காரணமாக பாகிஸ்தான் அணி ஆல்அவுட் ஆகி 129 ரன்களில் சுருண்டு போனது. பாலாஜி 3 விக்கெட்களைச் சாய்த்தார். அஸ்வின், யுவராஜுக்கு தலா 2 விக்கெட்கள் கிடைத்தன.

அதன் பின்னர் ஆட வந்த இந்தியாவுக்கு கம்பீல் 3வது பந்திலேயே ஆட்டமிழந்து அதிர்ச்சி அளித்தார். ஆனாலும் ஷேவாக்கும், கோஹ்லியும் சேர்ந்து பாகிஸ்தானுக்கு ஆட்டம் காட்டினர். 24 பந்துகளைச் சந்தித்த ஷேவாக் 29 ரன்களைக் குவித்து வெளியேறினார். ஆனால் கோஹ்லியின் புயல் வேக ஆட்டம் பாகிஸ்தானிடமிருந்து வெற்றியை படு வேகமாக பறித்துக் கொண்டு வந்து விட்டது.

61 பந்துகளைச் சந்தித்த கோஹ்லி, 2 சிக்ஸர், 8 பவுண்டரிகளுடன் 78 ரன்களைக் குவித்து கடைசி வரை ஆட்டமிழக்காமல் இருந்தார். அதேபோல யுவராஜ் சிங்கும் 19 ரன்களுடன் ஆட்டமிழக்கவில்லை.

இறுதியில், 17 ஓவர்களிலேயே 2 விக்கெட்களை மட்டுமே இழந்து 129 ரன்களை எடுத்து 8 விக்கெட் வித்தியாசத்தில் பாகிஸ்தானை விசிறியடித்து விட்டது இந்தியா.

இந்த வெற்றியின் மூலம் அரை இறுதிக்கான வாய்ப்பை இந்தியா தக்க வைத்துக் கொண்டு விட்டது. அடுத்து தென் ஆப்பிரிக்காவை சந்திக்கவுள்ளது. இதிலும் அட்டகாசமாக ஜெயித்தாக வேண்டும். அப்போதுதான் அரை இறுதிக்கான வாய்ப்பு மேலும் பிரகாசமாகும் என்பது குறிப்பிடத்தக்கது.

Story first published:  Monday, October 1, 2012, 8:06 [IST]
English summary
Virat Kohli hit two sixes and eight fours in a career-best 78 not out to guide India to a crushing eight-wicket win over Pakistan in the Super Eights at the World Twenty20 on Sunday. It was Kohli's best score in Twenty20 internationals, surpassing the 70 he scored against New Zealand just before this tournament. Earlier, Indian spinners Yuvraj Singh and Ravichandran Ashwin bagged two wickets each to dismiss Pakistan for 128 inside 20 overs. India chased the meager total with 18 balls to spare at R.Premadasa Stadium.
கருத்தை எழுதுங்கள்